'Sut mae hi MEWN GWIRIONEDD!' Deall llesiant - newid mawr yng Nghymru

Ddydd Iau 3 Mawrth cynhaliom ni’n pedwerydd Digwyddiad Hysbysrwydd Cenedlaethol yn Stadiwm Dinas Caerdydd, Caerdydd.

Thema allweddol y digwyddiad oedd ‘Sut mae hi MEWN GWIRIONEDD’ – Deall llesiant – newid mawr yng Nghymru. Nod y digwyddiad oedd:

• Gwella dealltwriaeth o rôl a phwysigrwydd yr asesiadau llesiant;
• Archwilio’r gorgyffwrdd a’r gwahaniaeth rhwng asesiadau gwahanol;
• Trafod defnydd data a thystiolaeth, a’r cwestiwn ‘beth os’;
• Archwilio sut allwn ni gynnwys dinasyddion yn effeithiol ac ymgysylltu â nhw; a
• Darparu modelau ac enghreifftiau ymarferol y gall cynrychiolwyr eu hystyried/eu hysgwyddo.

Denodd y digwyddiad 100 o bobl ac, yn ogystal â chynrychiolwyr o’r mwyafrif o awdurdodau lleol yng Nghymru, roedd cynadleddwyr hefyd o’r sector iechyd a’r trydydd sector.

Cafodd y digwyddiad ei agor gan Gadeirydd Bwrdd yr Uned Ddata, y Cynghorydd Jeff James, wedi ei ddilyn gan Christopher Stevens, Pennaeth Cangen Cynllunio a Phartneriaeth a Claire Germain Pennaeth Partneriaethau Llywodraeth Leol, Llywodraeth Cymru. Cynhaliodd Chris a Claire sesiwn holi ac ateb a symbylodd lawer o drafodaeth.

Clywsom ni hefyd oddi wrth Dr. Alan Netherwood o Netherwood Sustainable Futures a siaradodd am ei waith gyda Chymdeithas Llywodraeth Leol Cymru (WLGA) ar Raglen Mabwysiadwyr Cynnar Deddf Cenedlaethau’r Dyfodol a gwaith am lywodraethu yn y dyfodol ym Mhrifysgol Caerdydd i archwilio sut y gall anghenion cenedlaethau’r dyfodol gael eu cynrychioli mewn asesiadau llesiant.

Yn ogystal, denodd y digwyddiad arddangoswyr o’r sector cyhoeddus. Roedd yr arddangoswyr yn cynnwys:

• Swyddfa Archwilio Cymru
• Cyngor Gofal Cymru
• Cyfarwyddiaeth Gwasanaethau Cymdeithasol Llywodraeth Cymru
• Arfer Da Cymru
• Cymdeithas Llywodraeth Leol Cymru (WLGA)
• Uned Ddata Cymru
• Dewis Cymru
• Cyfarwyddiaeth Ystadegau Llywodraeth Cymru.

Cyn ac ar ôl cinio, cafodd sesiynau trafod ysgogol eu cynnal a brociodd y meddwl. Roedd y rhain yn canolbwyntio ar bynciau:

• Cefnogi datblygiad Asesiadau o’r Boblogaeth
• Nodau cenedlaethol, egwyddor datblygiad cynaliadwy a dyletswydd newydd yr Archwilydd Cyffredinol: sut mae cyflawni ymagwedd ystyrlon, gymesur, ar sail risg at archwilio?
• Data cenedlaethol, tystiolaeth leol
• Deall anghenion y dinesydd: Rôl cyfranogiad ac ymgysyllti effeithiol
• Cenhedlaeth 2050: Mae angen heriau hirdymor ar gyfer strategaethau hirdymor
• Dadansoddi ymatebion ar waith

Cafodd y sesiynau eu hwyluso a’u cefnogi gan gydweithwyr o Swyddfa Archwilio Cymru, Iechyd Cyhoeddus Cymru, Cyfranogiad Cymru, Asiantaeth Gwella Gwasanaethau Cymdeithasol, Cymdeithas Llywodraeth Leol Cymru, Llywodraeth Cymru, Cyngor Sir Ceredigion, Dinas a Sir Abertawe a Bwrdd Iechyd Prifysgol Cwm Taf.

Russell De’Ath, Cynghorydd Rheoli Adnoddau Naturiol Cymru, Cyfoeth Naturiol Cymru, ddaeth â’r diwrnod i ben, gan siarad am sut mae Bil yr Amgylchedd (Cymru) yn rhoi ffocws arbennig i Cyfoeth Naturiol Cymru wrth gyfathrebu risgiau a chyfleoedd mae rheoli adnoddau naturiol yn eu cynnig ar gyfer llesiant dynol, a sut maent yn mynd ati i ddelio â’r her newydd a sut y bydd hyn yn llywio asesiadau o lesiant a chynlluniau llesiant.